MAAF MEK, AYOH... Oghe malu nok pakoh Barisae!

(pemuisian dilema jiwa pengundi Kuala Besut)

nukilan: NUWA AITAWA

(i. Anak Lelaki)

Mek... Ayoh...

Oghe nok mitok maaf bbanyok

Terik ni oghe toksir doh pakoh Barisae,

Bukae toksir sokong parti Mek-Ayoh,

bukae toksir pakai nasihat Mek-Ayoh...

Oghe malu bedo’oh ko saing-saing,

Saing-saing hak duk di bandar-bandar nuh..

– Hok duk KL, Kuantan, Pulau Pinang, Shah Alam, Johor Bahru..

Nak-nak kali kelik, betemung jah... semua duk royak

pakat toksir belako doh... toksir doh ko Barisae!

Demo tu wat nganjing nah pulok ko oghe...

“bakpo gak mung soghe nih... duk pakoh ko Barisae lagi...???

kemah-mening dak ddegih nah nih???

Oghe pakat toksir blako doh ko dacing!

Mung ni telae “beh” gamok nyo???”

Bukae setakat tu Mek, Ayoh...

Saing-saing kato oghe ni ketinggalae zamae, ttingal keretapi dah..

Napok do’oh, walau duk d’bandar, oghe tak ikut perkembangae,

Tak maju pemikirae suppo saing-saing laeng...

“Acu gak mu tilik kelih!!

Mana ada lagi bandar besar hak buleh ko Barisae nyo?? Mano??

Dari 13 negeri, tolok Johor ngae Perlis jah,

semua ibu negeri buleh ko Pakatan Rakyat belako doh!

Kota Bharu PAS, Kuala Teganung PAS, Kuotae Keadilan..

KL, Pulau Pinang, Seremban, Melaka.. nya tang ko DAP

Pah ko Kuching Sarawok, Kota Kinabalu Sabah pong Barisae kaloh belako doh!”

“Dalae negeri kito sdiri... Teganung, tengok laa...

Tolok Besut, Setiu, semua bandar ibu dekroh laeng

Toksir belako doh ko Barisae...

Cukai Kemamae, Sura Dungun, Rhu Rendae Marae, Bandar Kuala Teganung sediri..

Buleh ko PAS belako doh!!!

Puok-puok duk d’hulu jah, hak duk jauh dari bandar jah duk sokong lagi Barisae nih!!!

Suppo mung laaa....!!!”

Aduhhh... bilo saing-saing duk palu ggitu semmo..

Oghe pun naik bera lah jugok muko nih...

Oghe malu Mek... Ayoh...

Pulok tu oghe tilik kelih, memae jolor sengoti hak saing-saing duk royak tu...

Oghe kawasan bandar, semua pakat nok ko PAS, nok ko Pakatan Rakyat belako doh..

Tinggal hak d’hulu-hulu jah duk sokong Barisae lagi...

Kohor hulu, kohor kuat Barisae...

Tu ya oghe malu sangat tuh Mek... Ayoh,

Oghe beraso suppo “daghak” bedo’oh duk sokong lagi ko Barisae nih...

(ii. Anak Perempuan)

Kito pung ggitu jugok Ma... Abah

Kito terik ni nok ko Bulae la pulok,

Selamo kening duk pakoh Barissaaaeee sokmo-sokmo...

Berpuluh tahun dah Barisae sokmo jjadi tok wokil kawasae kito nih,

Negeri Terengganu pun Barisae la jadi khajoae sokmo-sokmo

Kuala Besut kito ni kkalae kuat Barisae... yak bejamae ghetu lagi!

Tapi ggapo gak hok ado? Ggapo gak hak rakyat buleh?

Takkan Ma... Abah tak ingat dah...

Molek-molek kompleks ikan duk alik sini...

Khajoe nya gi alih buat hak baru seberae alik nun!

Alik nun tuh Seberae Kastae doh... Dun Kota Putero doh tuu...

Dun oghe laeng doh tu... Bukae Kuala Besut doh tuu...

Patut-patut gak... Doh mugo Barisae sokmo-sokmo jadi tok wokil,

Barisae sokmo-sokmo jadi khajoae.. maju benar dah tepat kito nih.

Tapi gak... ggapo sangat ado ssining???

Nok nyohor ado stesen bas, stesen teksi?

Kat oghe lain pun ado belako, comel lagi pada tepak kito benahhh!!!

Biar gak ada peluae khijo ko anok-anok mudo suppo kito nih!!

Kalu sengoti maju, sengoti ado peluae khijo tepat kito,

Nnamo khijoae anok Ma... anok Abah ni gi bederap pah ko Johor, pah KL cari khijo nyo???

Soh ko begapo Ma... Abah...

Tengok jeti pelancongae di ssungai tu sudoh laa...

Tepat oghe lain pun ado jeti suppo kito jugok... tapi cukup lekap dengae macae-macae..

Ado kedai, di jeti tu sediri, ado talipon, ado restoreng, ado mesin wat tubik pitih...

Sapo-sapo hak nak naik bot pelancong dak payah susah-susah gi atah beris nuh,

cari mesin wat tubik pitih...

Lamo doh awok-awok di kkalan bot nambang nih duk ssungut bab ni...

Barisae dengar, tapi dak ambil cakna pun...

Bakpo Ma... Abah?? Sebab orang kuat dio kato, “kalu kito dak layan puok-puok ni pun, taing pilihae rayo, demo pakoh Barisae semacae”.

Sabak tu kito raso malu ko diri, Ma.... Abah...

Malu... beraso suppo nyo tipu hidup-hidup ko Barisae!

Terik ni kito nok try wi tok wokil ko PAS la pulok sekali,

mana tahu dio buleh asoho wi ado kemudahae hok rakyat duk mitok tu...

(iii. Rakan Warga Tua)

Senoh, Dolloh... Lijoh, Deramae...

Aku ning saeng lamo mung... lamo benar doh kita besaing nih.

Aku nok royak nyo, jolor sengoti hak anak-anak mung duk royak tu...

Mung jangae duk begaduh maroh kak ku...

Mugo hak budok-budok tu sebut tu

memae barre sebenar berlaku atas tepat kito nih...

Eh... budok-budok ni.. Noh, Joh... dio tak suppo kito mulo doh...

Betul laa mung buleh kato mung makae garae lebih dulu pada demo nih...

Tapi mung pun tahu anok-anok mung sediri ni ngaji lebih tinggi pada mung...

Anok-anok mung berjalan lebih jauh pada mung,

bersaeng-rodong lebih ramai pada mung...

Anok-anok mung, suppo anok-anok aku jugok,

demo ni lebih cerdik pada kito... Mae, Loh...

Demo ni buleh tilik kelih, buleh nilai mana baik, mana tak comel...

Pah pulok tu.... Aku pun duk tengok kito ni beranjak tak kena arah,

Tepat kito ni, Kuala Besut kito ni memae kohor ssohor,

Tapi ssohor dalam bab tak kena gaya...

Tak patut mung tak ingat...

Tepat kito ni, yak di’jamae kito kecik lagi besohor doh...

Kuala Besut kito ni asalnya kawasae oghe nutut ilmu,

Ado pondok, ado tepat ngaji ugamo, ado ulama ssohor tepat kito ni...

Ramai anok murid dio, pakat mari dari serata dekrah, serata negeri...

Arwah Tok Guru Ayoh Mat... ssohor namo tu,

ado pondok dio kat Ssejid Kuala Besut.

Lo ni, pah mmano ssemo tuh???

Bukae setakat pondok takdok bako...

Suasano ilmu agamo tu pong payoh nok juppo..

Patut-patutnya kito kohor sari kohor lah ke depae kohor lah kecomel...

Tapi hak jjadinyo, kohor ssohor, kohor naik malu muko kito-kito hok tuo-tuo nih...

Takkan mung tak rajin kelih dalae suratkobar,

Kuala Besut dianggap kawasae itae...

dalam bab ramainya penagih dadah,

Dalam bab ramainya pengidap HIV/AIDS,

Kereknya berlaku kejadian jenayah hak besar-besar..

Berlakunya pesta minum arak....

Alo la wey.... Ssohor memae ssohor laa...

seluruh negara baca cerita suratkobar, tengok berita tv,

dengar laporae radio sebut... “Kuala Besut.... Kuala Besut....”

Dolloh, Deramae, Senoh, Lijoh...

Kito ni kohor sari kohor alah kotuo...

Esok karae nak masuk kubur dah...

Aku tak tahu lah mung balah mana...

Tapi aku soghe duk rasa padae dah duk pakoh Barisae selamo kening...

Aku pong toksir doh subahat rosoknya akhlak masyarakat,

Hilangnya ilmu agamo, nyo ganti dengae macae-macae benda hak tak molek

Henggo kae aku sediri mari besero malu nak ngaku aku oghe Kuala Besut...

Walhasilnya...

Kito keno ppakat tukar selero, alih raso laa etek...

Senoh, Dolloh.... Lijoh, Deramae.... Kito wi peluae ko PAS la deh sekali ning...

Mugo mulo jamae dio jjadi khajoe kito buleh kelih dah...

Masjid-surau hidup molek, oghe ppakat nak ko ugamo,

Kito hak penaik dio jjadi khajoe pun BULEH TIDUR JENERA...

Kampung Air Tawar, Besut,

2 Ramadhan 1434.

(Puisi ini dideklamasi tiga suara untuk dokumentasi audio-visual khas sempena PRK Kuala Besut, Terengganu, http://www.youtube.com/watch?v=DP6ukdxv1XI&feature=player_detailpage)